*

電郵地址
密碼
submit
submit
CLOSE
2018-04-11 15:25:48

又要驚,又要入場聽!6部超有創意另類恐怖片

Text: Nic Wong

《無聲絕境》聽日正式上映,好多人都問「驚唔驚架?」,但係又想入戲院睇下。正所謂,又要驚又要飲椰青,近年有邊幾部另類恐怖片,又係你一路驚一路睇?

《無聲絕境》(A Quiet Place)

呢部恐怖片,冇鬼但有怪獸,與其話恐怖,更加講係超級緊張,一出聲就死得,坐戲院個個都超靜,最恐怖係喺戲院入面,大家都鴉雀無聲,呢一秒鐘好溫馨玩緊遊戲好happy,下一秒鐘又可能因為某啲聲音而怪物來襲,性命不保,提心吊膽,喺戲院睇嘅感受,仲驚過一個人睇啊!

 

《訪.嚇》(Get Out)

普遍來說,《訪.嚇》都被形容為恐怖片,偏偏金球獎就將佢列入音樂及喜劇類電影,仲有提名添。故事唔係講鬼,但實情恐怖過撞鬼,以為去咗郊外大屋見家長,不斷見到怪事,男僕人夜媽媽跑步衝埋嚟,女僕人又夜媽媽無啦啦照鏡,但原來係有詭計,恐怖得來又爽皮,少少驚都要睇!

 

《禁室殺戮》(Don’t Breathe)

繼續係冇鬼,但一樣恐怖。不過,呢部戲本來果啲後生仔主角係衰,想闖入人地屋企偷嘢,好衰唔衰,去咗個獨居眼盲老伯屋企,諗住食硬佢啦,點知你以為佢雙目失明,就恰佢唔停?佢雖然眼盲,但係係一個退役老兵,感官過人又有錢,有限嘅空間、簡單嘅劇情,但節奏超緊張,抖大啖氣都死得。

 

《鬼上你的床》(It Follows)

又話講恐怖片,一部鬼片都冇?唔係,呢部《鬼上你的床》開宗明義講鬼,但又唔係公式恐怖片,唔係厲鬼豔鬼嘅攻擊,反而都係營造氣氛,等你疑神疑鬼,加埋撞鬼後要搵人做愛來驅鬼(聽起來好似《午夜凶鈴》睇完錄影帶要傳畀下個),更直接嘅係,咪就係傳說中嘅「性交轉運」,少少鹹少少驚,鬼片都唔一定為嚇而嚇嘅!

 

《無名屍詛咒》(The Autopsy of Jane Doe)

呢套堅驚,尤其後半段,但後半段勁公式無驚喜。反而前半段好有創意,好有舖排,簡簡單單兩個男人,一條無名女屍,好靜,就連啲解剖室入面嘅空氣都好靜,確係有創意。之後女屍繼續唔郁,但又停電,其他屍櫃嘅死屍都郁,驚到真係唔知麥明詩會唔會都郁下……

 

《末世街10號》(10 Cloverfield Lane)

老老實實,我唔肯定呢部計唔計恐怖片,驚慄、懸疑、洗腦實在好似好似。《末世街10號》貴為《末世凶煞》的二部曲,女主角一醒就被禁錮,然後想逃走又見到出面好似仲恐怖,到底室內恐怖,抑或室外更恐怖?寧願衝出去死喺怪物手上,抑或繼續做奴隸?諗起都覺得現實好恐怖!

 

 

2018-04-09 11:54:47
《歡迎光臨夢幻樂園》:從來都沒有夢幻樂園,只有殘酷現實

Text: Nic Wong

先旨聲明,這是一部很多細路的電影,而我很討厭細路。而且這部電影的細路真的很乞人憎,又吐口水、舉中指、四處閒逛、火燒無人屋、搞到旅館停電等等,但那種現實真的多於演技本身。幸好,電影毫無掩飾細路的麻煩,亦沒有美化細路所謂的天真爛漫,那份殘酷現實才足以令我看下去。

更直接是,此片導演Sean Baker非常擅寫這種低端人口的殘酷現實,好像之前《小明星》、《跨性那話兒》就令他備受矚目。今次寫細路之餘,重點更在於一個不識教女但又要教女的年輕老母,住在汽車旅館掙扎求存的故事。



我們身邊其實有很多這類人:自我固執、性格剛烈,但骨子裡又重視家庭及某些道德觀念,不想被人睇死,卻因性格改變不了而走上末路。女主角堅持自己,曾到酒吧跳舞卻又不想接客,最後被炒魷魚;轉到街上兜售假香水甚至主題樂園入場券,最後又遇上警察而棄貨逃走。不難估計,最後就是要接客,只好以身體和姿色來賺錢。同一房間下,年輕老母在床上接客,年幼女兒就在廁所浴缸上洗澡玩耍,當然紙包不住火,最終也步向結局了。

雖則我痛恨小孩,但不時想想她們的人生,到底你想她們做甚麼呢?她們不愁吃喝住宿,日日百無聊賴,尤其主角女兒,明明住在迪士尼樂園不遠矣,偏偏只能住在鄰近的「The Magic Castle」汽車旅館,一間無論名字和裝潢都想扮高級但實情呃不了人的廉價住所。就連新婚旅客訂錯了酒店,也堅持不肯入住,就知它只是一堆低端人口暫住的居所。


至於管理這間低端人口的旅館經理,由老戲骨William Dafoe飾演,性格外強中乾,經常對租客講明居住規則及底線,卻每每同情那對母女。每每口說叫她欠租,卻又容許對方遲交,每每爭吵過後,往往促使她有不同程度上的改變,間接逼她走上末路。又或者性格使然,不肯打份正正經經的工(她其實不大可能打工),結果就只好這樣的收尾。


此片令我想起一個關於菲律賓保和島的故事:話說,曾經有位資深旅遊記者告訴我,菲律賓保和島上的不遠處有個貧民窟,與悠長優美的沙灘只是一步之隔,但當局害怕貧民影響市容,嚇怕遊客,於是立例禁止貧民踏足沙灘,年輕貧民更從未嘗過灘上的美景,果真是一步之遙。所以,這個世界從來沒有夢幻樂園,只有殘酷現實。有的話,都只是堆砌出來的短暫假象。略嫌不夠現實,還可看看內地電影《嘉年華》,有異曲同工之妙。可能,結局更為悲慘。