*

電郵地址
密碼
submit
submit
CLOSE
2018-04-25 14:11:56

我要打十個!十個估佢唔到演過拳手的男主角

Text: Nic Wong

「你係咪好好打呀?」過去一直都有很多拳擊電影,印象中都是《洛奇》史泰龍、《狂牛》羅拔迪尼路,甚或是張家輝、彭于晏等等,而近年則有Stephy鄧麗欣帶拳套上擂台。以下十個男主角,你又記得他上過擂台打過拳擊嗎?

 

1)瑛太

繼《100円的愛》後,導演武正晴再拍拳擊故事《擂台物語》,找來瑛太做男主角。其實他所飾演的不是拳手,而是一個倒霉演員,只是他的女友(佐藤江梨子 飾)為支持他追夢,半推半就去拳擊社上班,後來女友絕望離去,瑛太才要踏上擂台打一場。當然,大家不要期望太大,但瑛太先做廢青,然後再上擂台,加上女友死心塌地的愛,滿有驚喜。(《擂台物語》現正上映中)

 

2)古天樂

再次恭喜古生榮獲今屆金像影帝。很多人都說,《殺破狼.貪狼》是他個人首次拍的動作片,那《柔道龍虎榜》呢?其實,古天樂也演過拳手,就是2001年的《野獸之瞳》,拳頭極重,更加去打黑市拳,曾經一度風光,最後被黑人拳手活活打死。此片還有真正喜歡打拳擊的吳彥祖,不時翻看也覺好看。

 

3)郭富城

當年同樣有份演出《柔道龍虎榜》的郭富城,近年打得最勁,可能是扮演孫悟空,或者是開槍吧。早於1996年,他已經拍拳擊片了,在《浪漫風暴》中飾演跟隨洪金寶學藝的拳手,與當時仙女一般的李若彤談情,只可惜他錯手打死了對方的哥哥。到最後的結局,也是傷感的……只不過,當時三十出頭的郭富城,又打得似模似樣。

 

4)劉德華

常識題:劉德華有咩角色未做過?答案是,諗唔到。劉德華打拳?由《嘩!英雄》打跆拳,到《醉拳3》,甚至《阿虎》上擂台,同樣難不到他。只不過,一時間想不起,因為他實在拍過好多好多戲呢。

 

5)Will Smith

轉戰荷里活,其實更多演員拍過拳擊片,但你一時未必記得,好似Will Smith就是一例,他甚至在2001年電影《拳王阿里》扮演拳王阿里。兩人都是有色人種,亦不幸受過膚色歧視,所以他飾演阿里奪回拳王,正值美國歷史上民權和反戰盛行的年代,不只是擂台上的揮拳,而且有更深層的意義!

 

6)Christian Bale

蝙蝠俠打過拳,聽起來又理所當然。拍攝2010年《擊情手足》,正是Christian Bale拍緊《蝙蝠俠》三部曲期間,暴瘦至少30磅,戴假牙、扮禿頭,飾演一名天才拳手,後來因為吸毒而一蹶不振,最後重新振作上擂台,與同樣是拳手的弟弟身上,一同聯手。

 

7)Mark Wahlberg

《擊情手足》中同樣飾演是拳手的,還有Mark Wahlberg。這位《賤熊30》及《變形金剛》系列男主角,感覺有點肥,不像拳手,由於名氣關係,香港人更覺得他不是主角。其實,當年他曾經憑此片獲得金球獎最佳男主角提名呢!

 

8)Tom Hardy

蝙蝠俠打拳,《Dark Knight Rises》大反派Bane一樣打過拳?近年才真正冒起的Tom Hardy,向來大大隻好打得,2011年《鋼鐵鬥士》便飾演退役軍人,轉行做拳手打MMA。imdb 8.2,豆瓣網8.9,喜歡熱血拳擊電影的你,切勿錯過!

 

9)Hugh Jackman

狼人打拳,絕對冇難度,記性好的話,應該會記得他演過2011年《鐵甲鋼拳》,上演曾經的拳手。故事講述2020年(原來只是兩年後),人類拳擊已經無法滿足人類,轉而迷上機械人拳擊。Hugh Jackman場邊揮拳,控制機械人亞當,故事簡單,卻又感人。

 

 

10)Jake Gyllenhaal

最後為你送上2015年《再戰擊情》。「斷背積」難得超男人,爆肌現身,一開始與Rachel McAdams打得火熱,喪妻後超頹廢,之後找回自我,重新站上人生擂台,贏回拳王同時贏回家庭。拳擊片橋段非常套路,一定是低潮過後再振作,經過好教練指點(通常一樣是頹廢教練),戒掉酒癮、毒癮等惡習,為家人為愛人而戰。若然演員拍攝前激瘦或激增磅,魔鬼筋肉人出場,定必加分!

 

2018-04-11 15:25:48
又要驚,又要入場聽!6部超有創意另類恐怖片

Text: Nic Wong

《無聲絕境》聽日正式上映,好多人都問「驚唔驚架?」,但係又想入戲院睇下。正所謂,又要驚又要飲椰青,近年有邊幾部另類恐怖片,又係你一路驚一路睇?

《無聲絕境》(A Quiet Place)

呢部恐怖片,冇鬼但有怪獸,與其話恐怖,更加講係超級緊張,一出聲就死得,坐戲院個個都超靜,最恐怖係喺戲院入面,大家都鴉雀無聲,呢一秒鐘好溫馨玩緊遊戲好happy,下一秒鐘又可能因為某啲聲音而怪物來襲,性命不保,提心吊膽,喺戲院睇嘅感受,仲驚過一個人睇啊!

 

《訪.嚇》(Get Out)

普遍來說,《訪.嚇》都被形容為恐怖片,偏偏金球獎就將佢列入音樂及喜劇類電影,仲有提名添。故事唔係講鬼,但實情恐怖過撞鬼,以為去咗郊外大屋見家長,不斷見到怪事,男僕人夜媽媽跑步衝埋嚟,女僕人又夜媽媽無啦啦照鏡,但原來係有詭計,恐怖得來又爽皮,少少驚都要睇!

 

《禁室殺戮》(Don’t Breathe)

繼續係冇鬼,但一樣恐怖。不過,呢部戲本來果啲後生仔主角係衰,想闖入人地屋企偷嘢,好衰唔衰,去咗個獨居眼盲老伯屋企,諗住食硬佢啦,點知你以為佢雙目失明,就恰佢唔停?佢雖然眼盲,但係係一個退役老兵,感官過人又有錢,有限嘅空間、簡單嘅劇情,但節奏超緊張,抖大啖氣都死得。

 

《鬼上你的床》(It Follows)

又話講恐怖片,一部鬼片都冇?唔係,呢部《鬼上你的床》開宗明義講鬼,但又唔係公式恐怖片,唔係厲鬼豔鬼嘅攻擊,反而都係營造氣氛,等你疑神疑鬼,加埋撞鬼後要搵人做愛來驅鬼(聽起來好似《午夜凶鈴》睇完錄影帶要傳畀下個),更直接嘅係,咪就係傳說中嘅「性交轉運」,少少鹹少少驚,鬼片都唔一定為嚇而嚇嘅!

 

《無名屍詛咒》(The Autopsy of Jane Doe)

呢套堅驚,尤其後半段,但後半段勁公式無驚喜。反而前半段好有創意,好有舖排,簡簡單單兩個男人,一條無名女屍,好靜,就連啲解剖室入面嘅空氣都好靜,確係有創意。之後女屍繼續唔郁,但又停電,其他屍櫃嘅死屍都郁,驚到真係唔知麥明詩會唔會都郁下……

 

《末世街10號》(10 Cloverfield Lane)

老老實實,我唔肯定呢部計唔計恐怖片,驚慄、懸疑、洗腦實在好似好似。《末世街10號》貴為《末世凶煞》的二部曲,女主角一醒就被禁錮,然後想逃走又見到出面好似仲恐怖,到底室內恐怖,抑或室外更恐怖?寧願衝出去死喺怪物手上,抑或繼續做奴隸?諗起都覺得現實好恐怖!