*

電郵地址
密碼
submit
submit
CLOSE
issue JAN 2015 VOL: 149
2015-01-07 10:00:00

不算是杜Sir粉絲的我 持續翻炒的杜Sir作品
《無涯:杜琪峯的電影世界》散場後我問自己:我是否杜琪峯fans?
諗來諗去,不算是,原因如下:1.我沒有睇晒所有杜Sir作品;2.尤其他的愛情片(即《乜乜乜之戀》及《乜乜男女》之類),我一向敬而遠之;3.就連《嚦咕嚦咕新年財》我都冇睇(因為我完全唔識打牌)。

但他多部戲我又真的翻炒咗N次,而且相信會持續翻炒,翻炒到我與世長辭嗰日。
以下是我持續翻炒的杜Sir電影,排名可能有少少分先後。

《暗戰》系列:《1》好睇啲定《2》好睇啲?我冇嚴格比較過。《1》精采在於描述一個男人,執著於怎樣在生命走到盡頭的時候設下連環布局報復,《2》精采在用執著於贏的持續大輸家林雪,同你講放開才是正道。但無論《1》定《2》,最好睇的都是劉青雲。冇咗佢,我肯定唔會咁執著地翻炒落去。

《暗花》:OK,杜Sir只是監製,但點睇,成齣戲都擺明貫徹著杜琪峯意志吧。當日單拖在沙田娛樂城的戲院(已執,改建成教會)睇,全場數埋十個人都冇——冇錯,那是香港電影最壞的年代,但就在那最壞的年代,杜Sir讓我欣賞到一齣澳門回歸前腥風血雨下兩個男人的宿命故事。而宿命,一直是由一個無人觸碰得到的權力所遙控。

《兩個只能活一個》:OK,杜Sir也是監製,但同樣貫徹著他的意志。一男一女,同是天涯最淪落的人,同樣在找一個生存下去的機會,和希望。電影上映年份,1997年。(好可惜,這齣戲我冇機會再翻炒,因為我隻VCD唔知借咗俾邊個,而阿邊個又一直冇還碟,頂。)

全文請參閱149期《JET》。
issue DEC 2014 VOL: 148
2014-12-15 10:00:00
列尼.史葛 成為大片工匠前/後
12月,冇一齣荷里活大片想睇。
《翻生侏儸館3》?我連第二集都冇睇。
《哈比人》第三集?我連第一和二集都未睇;不過,碟就買咗,只是實在未有勇氣拎出嚟睇(咁又買?)……一直認為拍《哈比人》是一個很錯的決定,拆成三集來拍就更錯(當然對電影公司來說,票房收得就是正確商業決定)。
《出埃及記:神王帝國》?嘩,我對這題材嚴重地零興趣喎。而當我知道導演原來是列尼.史葛(Ridley Scott)時更打咗好多個突——有《普羅米修斯》續集你唔拍你走去拍甚麼CG動作版摩西史詩式故事?嘿。愈來愈唔明佢諗乜。

我當然喜歡列尼.史葛,他的幾齣作品甚至已成為我成世人不能磨滅的寶貴記憶。憑《異形》響朵後,列尼.史葛沒有把自己局限成只拍科幻的導演(當然,《2020》的慘淡收場可能令他不得不改拍其他題材),警匪古裝戰爭軍事甚至連公路電影都拍過,有啲「好得」有啲「唔太得」(但大致沒有出現過「好唔得」的情況)。

像《帝國驕雄》,為他贏來奧斯卡最佳電影,但我本人睇過一次後就從未翻炒過,可能是我不嬲憎羅素高爾、可能是我不嬲憎羅馬時代背景,更大可能是當中開始呈現了列尼.史葛的工匠味——因為資方出得起錢,導演又擁有豐富(拍大片)經驗,每一樣都執到最好了,但執到最好的結果不一定就是令人看得深刻和滾動(近年大部分荷里活大片都有這問題)。《帝國驕雄》後的《天國驕雄》和《俠盜.驕雄》都有類似問題。

或者咁講:列尼.史葛是頗撞手神的。在他工匠味開始濃厚的「後帝國驕雄」時期,又拍過很精采的《犯罪帝國》,把上世紀六十年代末至七十年代的黑人幫派故事拍出戲味(甚至有少少blaxploitation感覺),一個黑人怎樣由小毒犯爬到去做大佬再面對家族內部問題,既是一個心狠手辣者的江湖傳記,同時又側寫了那個混亂時代。

全文請參閱148期《JET》。