*

電郵地址
密碼
submit
submit
CLOSE
2018-01-02 17:44:06

《Black Mirror》S04E02 - Arkangel:偷睇神器,累人累己

Text: Nic Wong

成日諗,科技先進到有google glass,點解唔出隱形眼鏡版google glass,直接用眼球控制影相,變成「我對眼就係證據」?當年睇《玩謝麥高維治》,走入麥高維治嘅腦袋,用佢對眼睇世界。呢次S04E02,以上兩樣撈埋。

故事講述,一朝被蛇咬,十年怕草繩,主角係一名阿媽,因為阿女細細個短暫失蹤過,於是就參加試驗計劃,mon實阿女一舉一動,包括阿女對眼睇緊乜野、心跳率幾多、體溫高低、GPS位置等等,仲有PG家長指引mode,但凡睇到血腥、暴力、色情野全部打格仔模糊化,搞到阿女仲好奇,愈睇唔到愈去自殘,愛你變成恨你,中途熄機退出計劃,將整個監測系統擺埋床下底。

只不過,養兒一百歲,長憂九十九,阿女夜歸未見人,拗底mode開動,即刻打晒畀阿女所有同學同佢哋老母,都搵唔到阿女,靈機一觸,床下底有果部封塵嘅「偷睇神器」,原來個system仲work緊,阿媽一開機,即刻睇到阿女同個男人搞緊嘢,挑起佢關心阿女果條神經,然後日又偷睇夜又偷睇,更發現阿女又搞嘢又吸毒,於是佢以阿媽嘅身份要脅阿女男友,又借機會畀阿女食事後丸,於是搞出大頭佛,最後以另一方式永遠偷睇阿女,保護佢嘅一生⋯⋯

作為阿媽,好難話佢錯晒;作為阿女,吸毒同未夠秤偷嘗禁果,亦都幫唔落,但人生就係咁,自由就係咁,與其步步為營,不如步步驚心,唔跌過唔知痛,唔跌過亦唔會知痛苦後嘅快樂。父母識得放手,仔女先會長大,否則靠幾多先進科技都冇用。冇錯係好娘,但事實就係咁娘,不聽老人言,吃虧在眼前。

2017-12-30 00:29:45
《Black Mirror》S04E01 - USS Callister:唔好得罪IT狗

Text: Nic Wong

《Black Mirror》重臨,講未來科技。第四季第一集,一嚟即講IT狗,正確嚟講,講一啲好叻寫電腦編碼嘅人,亦係設計遊戲嘅人,現實生活被欺負被冷落(其實可能只係佢主觀感覺),於是就用佢自己嘅優點,設計咗個殘酷遊戲,同埋搵方法拎晒對佢唔好嘅人嘅DNA,複製佢地入去自己個game,逐一折磨,日頭冇人理自己,夜晚就自己入埋隻game折磨佢地,最後被困嘅人用盡辦法諗點樣死,都唔想畀呢條IT狗折磨。

話說,現實生活同game入面,係平行時空,但入面嘅角色呢,雖然同現實嘅自己接觸唔到,但一樣係base on現實中嘅性格、造型、思想等等,有血有肉有感情。老實講,game入面嘅人,只係現實自己嘅其中一個分身,佢喺入面點痛點死,點樣都唔關你事,但你知道自己喺某個平行時空畀人折磨,都覺得慘啦!要脫離苦海,喺game入面嘅人就要諗辦法死,因為IT狗控制晒全個game,係生係死係點樣都係佢控制,除非佢突然間暫停遊戲,跳番出現實嘅一段短時間。於是乎,喺game入面被困嘅人,唯一辦法要連繫番game出面,即係現實中嘅自己,然後喺佢pause game期間盡量延長,令遊戲內外嘅人都可以buy time阻止IT狗。至於點樣控制番game出面嘅自己?只有自己先知自己嘅弱點,然後勒索自己(一樣要關科技事),犀利。

結論係,唔好得罪IT狗,否則佢夜晚返去會玩殘你囉,虛擬同現實,無論咩世界,人玩我我玩人,以為可以玩殘人嘅,最後可能會係玩殘自己。

IMDb 9.0 / Rotten Tomato 93% / 豆瓣 9.2