*

電郵地址
密碼
submit
submit
CLOSE
issue JAN 2018 VOL: 185
2018-01-03 18:00:22

《廣告牌殺人事件》:反正你都是幫兇

Text : Nic Wong

《廣告牌殺人事件》?第一時間,我想起那條關於麥當勞廣告牌跌下來,五人之中三個死了,另外兩個生存那條IQ題(因為招牌是M字)。現實是殘酷的。有人笑看人生,認真你就輸了;有人永不放棄,誓要追求真相,有壓力未解決。很明顯,《廣告牌殺人事件》主角是後者。

故事講述,女主角是一名母親,愛女不幸被姦殺,苦等七個月案情亳無寸進,警方卻只顧打黑人恰細路,於是她在極度憤怒及絕望之下,決定一口氣買下鎮上最當眼的三塊公路大型廣告牌,以諷刺性字眼向警察挑機,矛頭直指當地很受民眾歡迎、患上絕症的警長(專恰黑人細路的警方,阿頭竟然受民眾歡迎,認真諷刺)。結果,廣告牌出位舉動引起注意之餘,更惹來全鎮的爭議,當中還牽涉更多更多的人士,結果真的有人因廣告牌而死去,事件全面失控,一發不可收拾。

諷刺警方,談不上一個罪名,換轉是香港,這件事情根本沒可能發生。辱警的道德審判、某某勢力的動員恐嚇攻擊、搞你家人朋友同事之類、切斷你的經濟來源等等,電影中多少都有發生,但到時香港肯定無限升級,看看紅隧口、港鐵那些廣告尺度就知道,或者你不出街,上網看看新聞就知道,除非你只看大台新聞啦。

電影中,除了那名疑似強姦犯外,其實沒有一個絕對的壞人,但所有人的行為舉動,幾乎一面倒偏向著壞方向進發,以暴易暴,以憤怒引發憤怒。人人都知道以暴易暴不對,仇恨只會帶來更多仇恨,單單是投擲雞蛋對抗高牆,本身也是一項非法的攻擊行為,人人得以誅之云云。

問題是,當弱者去到絕境,愈窮愈見鬼,根本輸到沒甚麼好輸的時候,真相永遠未明,情緒永遠受困,唯一能夠做的是,堅守信念去反抗,只要能夠稍稍拖垮涉事者也算不錯。也許你不認同,沒所謂,反正沉默的你都是幫兇。

 

《廣告牌殺人事件》(Three Billboards Outside Ebbing, Missouri)
上映日期:1月18日

2018-01-02 19:11:50
《Black Mirror》 S04E03 - Crocodile:冇記性,有時可能係一件好事

Text: Nic Wong

記性差、唔記得、冇印象,絕對係香港人嘅特點,尤其係另一半問你尋晚做咗乜,老細問你邊個嘅主意。世界大同,《Black Mirror》都好鍾意拍記憶,最記得S01E03《The Entire History of You》,不斷搵搵搵搵記憶。

呢次負責搵記憶係保險公司人員,整咗部「錄憶機」,靠腦電波、氣味、音樂咁,喺意外發生後,問證人拎埋視像證據,即係人腦入面嘅記憶,幫手claim保險。有趣係,呢樣野本來係義務,搞搞下又半推半就,唔幫手嘅話即係知情不報。老實講,記憶嘅野,你以為諗就有,唔諗就冇,但好多時其實你控制唔到,結果好唔想諗嘅野浮晒出嚟,招致殺身之禍。

《Black Mirror》第四季咁多集嚟講,呢集弱弱地,有冇必要咁殺人,變到好似B級片咁,殺完一個又一個,最正係講佢一個女人殺得性起,無論男人女人抑或細路,一個不留,偏偏數漏咗做一隻,天惘灰灰,而且錯殺咗個睇唔到嘢嘅,慘,記憶反被記憶誤。

結論係,原來記性太好唔係咁好,冇乜記性,有時可能係一件好事。

題外話:點解片名《Crocodile》,綜合網上意見有4個原因:

1)女主角殺人時流眼淚,好似鱷魚獵殺果陣,流出鱷魚淚

2)鱷魚獵殺果陣,基本上只出於本能同需要,不帶任何感情或思想,同女主角行為相似

3)經濟學上,被鱷魚咬住,理應止蝕,而唔係隻腳被咬,但隻手仲伸入鱷魚口拯救,否則連隻手都咬埋,一環扣一環,愈搞愈大,愈踩愈深

4)片中嘅「錄憶機」就像鱷魚嘴(個人認為呢個有啲牽強)。