*

電郵地址
密碼
submit
submit
CLOSE
2018-01-05 22:31:57

《Black Mirror》 S04E05 - Metalhead:可能係四季以來最差一集

可能,呢套Metalhead係《Black Mirror》四季以來最差嘅一集,幾乎係公認最差,IMDb 6.9,連7分都冇,人人睇過都話差。點解?我都想知。

故事非常簡單,41分鐘嘅黑白片,當中超過半個鐘都係女主角同一隻殺人機械狗捉迷藏互殺對方。劇情講述,一個末日世界,四處杳無人煙,兩男一女揸車出街去一個貨倉拎紙箱,對白提到原來想幫女主角家姐個仔拎野,事關仔仔患重病,想氹下佢開心。結果佢地去到貨倉搵到個紙皮箱,誤打誤撞解放咗一隻瘋狂殺人嘅機械狗出嚟,極速開槍殺死兩個男角,剩下嚟半個鐘就追殺女主角。

有趣係,其實果隻係變態殺人犯/喪屍/外星人/機械貓/乜都得,呢隻設定為有啲似《Kingsman: Golden Circle》嘅機械狗,又一次將科技作為劇集引旨,然後完全唔關事嘅你追我逐困獸鬥,最後得出寧願玩最原始嘅Teddy Bear,都唔想要一隻機械狗。冇病冇尾,唔合情理,B級片格局,一個字,差!

2018-01-04 13:00:50
《Black Mirror》S04E04 - Hang the DJ:交友app之後,都係要靠自己

Text: Nic Wong

科技結合愛情嘅電影劇集向來討人歡喜,好似《Black Mirror》上季S03E04嘅San Junipero就大受好評,今次食過翻尋味,又再拍出佳作,IMDb評分高達9.1。

劇集講述一對男女用交友系統搵到另一半,安排晒人選、約會嘅餐廳、過夜住宿等等,同埋可惡嘅相處時間。但喺呢個未來世界之內,佢地生活喺圍牆之內,唔能夠拒絕交友系統嘅指定安排。故事入面,男女主角初次見面,只能夠短聚12小時,兩個人都有愛意,但無奈夠鐘就要分開,繼續接受「被安排」同更多唔同人約會、唔同嘅相處時間,直至系統分析完,安排一個終身伴侶俾你。睇睇下,有啲似前年電影《單身動物園》。

之後,男主角被安排同一個女人約會,相處時間係足足一年,但約會第一眼就feel到雙方都唔happy,無奈要白白等時間過,呢一年內,兩個人相鲱食飯傾計上床,統統都係捱時間。另一邊廂,女主角睇嚟好彩啲,每每被安排嘅時間好短,可能係12小時或36小時,於是乎佢夜夜笙歌,好似晚晚都一夜情咁,就覺得好浪費時間,佢嘅人生只係為約會同做愛。後來男女主角重遇對方,重燃愛火,就決定唔理系統所講嘅相處時間,又原來唔理被安排嘅時間,先至係真理,一切只係交友系統嘅模擬測試⋯⋯

呢次好明顯係衝住時下嘅交友app而來,你鍾唔鍾意對方,就算逼你同佢對足一年都冇用,所謂嘅數據分析,可以計算到好多嘢,但感情嘅野,往往唔係大數據計得到。想搵真愛,唔可以只係等待命運嘅安排,必須要勇敢踏出多一步。