*

電郵地址
密碼
submit
submit
CLOSE
2018-01-06 22:16:52

《Black Mirror》S04E06 - Black Museum - 黑鏡回憶彩蛋最好睇

Text: Nic Wong

經過最差一集吧嘅Metalhead,來到今季最後一集,有人話呢集最好睇,作為第四季嘅結尾亦係最佳作結。上季用hashtag殺人蜂嘅Hated in the Nation做尾,成晒hashtag嘅流行程度,過咗一年,hashtag潮流有增無減,#metoo 風潮遍布全世界。

今次Black Museum反而唔講世界大事,focus講一間喺沙漠上嘅犯罪博物館,一個少女單拖入去參觀,就同館長兩個人行導賞tour,館長逐件介紹犯罪凶器,無論展品抑或牆上裝置,都有呢四季出現過,例如S02E02白熊工作頭套同logo、S03E02果個殺死人AR遊戲裝置,甚至係頭先講過S03E06殺人蜂嘅屍駭等等,穿插咁多季《Black Mirror》嘅劇集彩蛋,黑鏡迷必睇。

劇集可以細分為3個小故事,第一個係醫生可以同病人嘅痛楚同步,結果病人愈痛,醫生愈享受,痛上癮之後走上末路;第二個故事講老婆意外變植物人,臨死前思想植入老公大腦,結果一個人有兩種思想,聽落都覺得困擾;最後故事係疑似殺人犯記憶變成模擬電椅,等大家行刑電擊,好變態。

當然,故事走到最後,其實係一個復仇計劃,感覺係似番頭兩季由Channel 4製作嘅《Black Mirror》,亦暗暗想講,你想藉科技折磨人賺大錢,其實聰明反被聰明誤,科技反被科技誤,同第一集USS Callister嘅結局相似。

總括來說,第四季唔算好好睇,而且質素好參差,慶幸最尾呢集挽回少少聲譽,更重要係,當中隱藏超多彩蛋,所有黑鏡回憶番晒嚟。尤其而家,你睇頒獎禮就知,回憶比新鮮感更重要。

2018-01-06 02:16:33
《黑暗對峙》(Darkest Hour):學邱吉爾個膽

Text: Nic Wong

《黑暗對峙》,歷史片一齣。通常歷史片都悶,何況是一段你未必熟悉的歷史片。幸好,上年好多人都睇過《Dunkirk》,大概對當年英法盟軍在鄧寇克大撤退有所認識。加上Netflix劇集《The Crown》第一季對邱吉爾的介紹,所以大家對邱吉爾有多少認識,加上由老戲骨Gary Oldman像真度極高的造型及演技,值得一看。

邱吉爾在電影中的登場,正如歷史一樣,他本來是非主流選擇,只是保守黨劣勢之下,時任首相張伯倫無奈半被迫退位,只好揀一個同獲兩黨同意的人物而取代,於是選擇了邱吉爾並以絕對優勢成為戰時首相。他一直抵住壓力,每每用奇招抗敵,單單呼籲民用船隻拯救被困鄧寇克的盟軍,靠天吃飯之餘,還夠膽色。

初登首相後的黑暗時刻,邱吉爾夠膽拒絕向希特拉讓步,寧願打仗甚至打輸仗,都不願跟納粹德軍投降保國;另一膽色之處,他夠膽走入群眾,超級離地的他坐地下鐵,問普羅市民的心聲和意向。諷刺是,戰時他贏得市民的歡心,絕對支持,戰後連任失敗,但幾年後又再度成功當選首相。時至今日,多次大型調查都顯示他仍是史上英國民眾心中最偉大的英國人及英國首相。

從《黑暗對峙》當中,雖只是講1940年5月10日至6月4日的故事,但邱吉爾這廿幾日的經歷話你知,我們很少機會能夠成為偉人,但每個小人物都有機會影響其他人,直至集體影響之下,影響到大人物的想法,影響到整個社會的下一步。

黑暗時刻,你我也經歷中,但願像邱吉爾和當年英國市民一樣,成功捱過去,持續為民主及自由而戰,只要不投降,輸過可以再贏返。