*

電郵地址
密碼
submit
submit
CLOSE
2018-01-08 22:34:07

《The Room》& 《The Disaster Artist》:兩套爛片笑足1,000分鐘

Text: Nic Wong

今日金球獎典禮中,喜劇組影帝頒發期間,「型男」James Franco得獎而回,突然一名長髮、戴黑超的疑似傻佬走上台準備搶咪,及時被James Franco阻止了。那個疑似傻佬是誰?他名為Tommy Wiseau,有錢佬一名,2003年自編自導自演電影《The Room》,耗資至少600萬美金,總票房收回1,800美金,自此《The Room》成為「荷里活爛片王」。

老老實實,你未看過《The Room》,你絕對不能說自己看過爛片;但你看過《The Room》的話,又肯定你會很後悔自己看過這部電影,浪費了100分鐘。「浪費」這字眼絕無用錯:沒頭沒尾的劇情、對白及動作、性愛鏡頭猶如AV卻又挑不起甚麼性衝動、男主角(Tommy本尊)怪形怪相而且滿口怪異口音,與其說看100分鐘,其實是捱足100分鐘。

不過,這部電影是需要看的,而且,故事還未完結。上回說到首次上映總票房只有1800美金,但Tommy實在太有錢了,他深深不忿,於是由《The Room》上映開始,連續5年每個月付5000美金租用廣告牌,不斷提醒大家有這部電影的存在。

其後,傻人有傻福。《The Room》在午夜場再度上映後起死回生,贏盡觀眾口碑,愈爛愈要睇,入場觀眾更帶著與戲中相似的匙羹、膠樽、欖球等道具,跟著劇情在戲院內模仿Tommy一齊拋擲,結果變成潮流話題,是電影史上罕有的成功。美國《娛樂周刊》更在2008年為電影寫下長篇專題,紀錄電影由一塊神秘的廣告牌開始,直到成為全球焦點的經歷。

 

由《The Room》到《The Disaster Artist》(荷里活爛片王)

其後,《The Room》第二男主角Mark(即是Tommy戲內戲外好友),真身Greg Sestero寫了《The Disaster Artist》一書,講述他當日如何在演技班上遇到同樣喜歡占士甸的Tommy,隨後獲邀加入《The Room》的劇組。書本出版之前,手稿輾轉落入James Franco手中,適逢占士哥近年放棄型男形象,同樣對電影充滿熱誠和痴情,一拍即合,於是決定翻拍這位爛片神人Tommy Wiseau的故事,自導自演,還找細佬Dave Franco一齊演出,並公開當日一幕幕《The Room》變成爛片的拍攝真相。

所以,大家先抱著一看無妨的心態,先看100分鐘的「荷里活爛片王」《The Room》,然後再看James Franco扮演Tommy Wiseau的《The Disaster Artist》,肯定可以獲得十倍奉還的笑聲。原來,認真做無聊事,認真拍片變成爛片王,他朝都能熱鬧荷里活,登上金球獎的舞台呀!

又,其實Tommy是一個悲劇人物,首先是超有錢(有錢都算悲劇?),然後根據自己的喜好拍戲,結果籌備時不快樂,拍戲時不快樂,上映時不快樂。即使現在如此受歡迎,台下觀眾捧腹大笑,難道他又不知道大家都在嘲笑他嗎?這,絕對是有錢惹的禍,人太有錢便太傻,美國如此,中國一樣。遙遠的東方有朵雲,他的名字叫⋯⋯

 

《The Room》(瘟室) 1月13日起 百老匯電影中心特別放映 / 

《The Disaster Artist》(荷里活爛片王) 1月11日 正常上映

 

 

 

2018-01-06 22:16:52
《Black Mirror》S04E06 - Black Museum - 黑鏡回憶彩蛋最好睇

Text: Nic Wong

經過最差一集吧嘅Metalhead,來到今季最後一集,有人話呢集最好睇,作為第四季嘅結尾亦係最佳作結。上季用hashtag殺人蜂嘅Hated in the Nation做尾,成晒hashtag嘅流行程度,過咗一年,hashtag潮流有增無減,#metoo 風潮遍布全世界。

今次Black Museum反而唔講世界大事,focus講一間喺沙漠上嘅犯罪博物館,一個少女單拖入去參觀,就同館長兩個人行導賞tour,館長逐件介紹犯罪凶器,無論展品抑或牆上裝置,都有呢四季出現過,例如S02E02白熊工作頭套同logo、S03E02果個殺死人AR遊戲裝置,甚至係頭先講過S03E06殺人蜂嘅屍駭等等,穿插咁多季《Black Mirror》嘅劇集彩蛋,黑鏡迷必睇。

劇集可以細分為3個小故事,第一個係醫生可以同病人嘅痛楚同步,結果病人愈痛,醫生愈享受,痛上癮之後走上末路;第二個故事講老婆意外變植物人,臨死前思想植入老公大腦,結果一個人有兩種思想,聽落都覺得困擾;最後故事係疑似殺人犯記憶變成模擬電椅,等大家行刑電擊,好變態。

當然,故事走到最後,其實係一個復仇計劃,感覺係似番頭兩季由Channel 4製作嘅《Black Mirror》,亦暗暗想講,你想藉科技折磨人賺大錢,其實聰明反被聰明誤,科技反被科技誤,同第一集USS Callister嘅結局相似。

總括來說,第四季唔算好好睇,而且質素好參差,慶幸最尾呢集挽回少少聲譽,更重要係,當中隱藏超多彩蛋,所有黑鏡回憶番晒嚟。尤其而家,你睇頒獎禮就知,回憶比新鮮感更重要。