*

電郵地址
密碼
submit
submit
CLOSE
issue SEP 2020 VOL: 217
2020-09-17 15:57:35

港。字典 有冇責任保護廣東話 視乎你對佢嘅愛

個個都約你得閒飲茶,唔通個個都得閒約你飲茶咩。廣東話,或者話講廣東話嘅香港人,字裡行間就係有咁多修飾。哲學系碩士Wilfred Kwok,習慣記低神奇又得意嘅廣東話詞彙,兩年前開設Instagram帳號「港。字典」(@hk.dict),收集現今世代嘅日常詞彙,幫佢哋一一卸妝,一針見血之餘,部分真係有共鳴到駁唔到。

text.陳菁

 

修讀哲學,點樣令你反思日常語言嘅運用?
好多哲學家提出存在、靈魂、生命嘅問題,但維根斯坦就提出一個哲學觀,無論你理解任何一種哲學概念都受語言限制。當你嘗試回答何謂生命,都係透過我哋平日點樣理解「生命」呢個字,而唔係形而上嘅內容。維根斯坦認為人類頂盡都只能夠思考日常語言嘅運用,再冇進一步空間,所以唯一有意義嘅,就係探討語言嘅局限性。

點解會開設「港。字典」?
首先係見到外國有urban dictionary而香港冇,於是覺得好玩就做。另一個原因係我開IG前已經寫低一堆詞語,例如「弟兄姊妹」同「兄弟姊妹」,明明只係將兩個字換位,但一聽就知狀況唔同,前者講教會朋友,後者係有血緣關係嘅親人,我覺得好神奇。

你點解鍾意廣東話?
廣東話有啲嘢都幾好,佢有九聲,比普通話多一倍有突,抑揚頓挫多啲,用聲音抒發已經有優勢。我哋由細到大學中文,都係睇書面語,而講就講廣東話。書面語有正式感,但廣東話有親和力,有啲字喺英文都搵唔到,比如山旮旯。

建立「港。字典」需要好多字,你有冇一個系統去收集字詞?
我會分為三部分,首先係日常經驗,日常有趣嘅字會記低,其次係網上投稿,我未必直接用投稿嘅解釋,但我會再次翻譯,思考香港、世界同自己對嗰個字嘅解釋,而最後就係新聞出現嘅詞彙。但投稿經常面對嘅尷尬位,係好多投稿都好直白,會變咗好似潮語卡咁,解釋「淆底」就係「怕事」。我揀嘅字唔想太直白同膚淺,除咗有共鳴,都想有說穿現實嘅功能。好多字都係表裡不一,有時好直接嘅字,我想有個深層解釋,而比較兜圈嘅,就想寫到好直。有時唔係大家刻意避開,而係嗰個字已經發展到隱含其他意思。但有時都難免直白,比如一個同新聞相關嘅字,大家已經有明顯嘅意向,就好難有另一種解釋。

咁多表裡不一嘅字,點樣反映到香港人嘅性格?
唔能夠話唔夠坦率,只可以話太多修飾。有時會修飾到講唔到重點,小組討論同通識科會特別明顯,可以算係一個通病。比如問你疫情對香港有咩影響,明明重點係答影響,但好多考生都講疫情有幾嚴重。

內地同韓國綜藝節目好受新一代歡迎,點樣可以吸引佢哋嘅目光返去廣東話?
吸引佢哋嘅唔係語言,而係好玩嘅節目,如果香港成功出到有趣嘅嘢,佢哋自然會返返嚟。比如前幾年高登,即係而家嘅連登,所產生嘅討論區文化對廣東話貢獻唔少。另外,以前達哥紅嘅時候,晚晚做打機直播都吸引八、九千人睇,佢好多用詞都好港式,比如「一嘢轟落去」係完全廣東話嘅講法。

你覺得而家新嘅YouTuber有冇責任去推動廣東話?
係咪生於呢個地方,用呢個地方嘅語言就有一個責任呢?我用一個例子解釋,中國人傳統思想有孝道,子女有責任要孝順父母。但我覺得呢種責任並唔係來自於你出世就成為佢哋嘅兒女,而係因為佢哋養大你、對你好,得到子女嘅尊重,責任先隨之而生。你鍾唔鍾意一個語言都一樣,你有冇責任去保護佢、愛惜佢、宣揚佢,就係視乎你鍾唔鍾意呢種語言,你喺佢身上得到啲咩。

 

issue SEP 2020 VOL: 217
2020-09-16 15:20:34
黃明志 活用廣東話粗口 大家相處愉快

廣東話並唔係香港限定,同樣會出現喺澳門、廣州、新加坡,以及馬來西亞等地。混合各個地區語言嘅特色,建立出唔同面貌嘅廣東話。馬來西亞歌手黃明志話自己雖然講唔正,但廣東話對佢嘅影響非常深,同好多香港人一樣,佢都係聽四大天王同Beyond啲歌大。所以當留意到廣東話被淡化,雖然唔喺香港大,但都擁有同樣遺憾。


text.陳菁

 

馬來西亞粵語有咩特色?
馬來西亞粵語會穿插馬來話、英文,甚至閩南話,馬來西亞使用嘅語言有太多種,但冇一種特別專或者特別純,因為爲都有受其他語言影響。

你幾時開始對廣東話產生興趣?邊啲香港文化對你嘅創作影響特別深?
與其話對廣東話有興趣,應該話馬來西亞華人都畀廣東話影響得幾深。我哋細個睇嘅香港電影同電視劇都冇被翻譯過,係原汁原味嘅香港版。加上首都吉隆坡嘅華人都好興講廣東話,有啲中文媒體都以廣東話為主,電台都會播香港嘅廣東歌。就算係唔太流行廣東話嘅地區,當地人至少都識聽廣東話。我畀香港文化影響得好深,最主要係受到電影、電視劇同廣東歌嘅薰陶。我同大家一樣,都係睇《古惑仔》、周星馳、王晶嘅戲,聽Beyond同四大天王嘅歌長大。

對比馬來西亞粵語同廣東話,你認為兩者各自擁有咩個性?
我覺得正宗嘅廣東話唔會夾雜咁多其他語言,如果喺香港,最多夾雜少少英文同普通話,但大家都仲聽得明。因為被廣泛同深入使用,香港嘅廣東話已經發展出獨有又強烈嘅特色,創造出好多新嘅詞彙同俚語,呢啲都非常有趣。 而馬來西亞粵語最大嘅特色,就係會融入唔同語言嘅單詞,有時會直接用英文或者馬來語嘅文法。如果香港人聽到會覺得句子被調亂,或者當中好多詞彙會聽唔明。但對於馬來西亞人嚟講,呢啲都好正常。我哋有辦法一邊聽一邊自己拼湊,喺腦入面整理出正常句子,然後去消化同理解。

同一樣物件,馬來西亞粵語同廣東話經常有唔同讀法,你覺得邊啲特別有趣?
廣東話嘅落雨,我哋會叫落水;而廣東話嘅旁邊,我哋就叫邊皮,兩個詞語都受客家話影響。另外都有受福建話影響嘅例子,會將「咗」放喺詞彙嘅後面,例如「吃飽咗」同「上車咗」。仲有加咗馬來語嘅粵語,例如你好叻,我哋會話「你好pandai」,即係好聰明咁解。

創作〈學廣東話〉用咗幾耐?對你嚟講有咩難度?
一般填詞我大概用三至八個鐘,但呢隻歌我寫咗三日,搵咗好多資料,亦思考咗好多嘢,呢個就係傳說中嘅「無聊事認真做」。我覺得最大嘅難度係唱歌,只要咬字唔夠準,聽落就好奇怪。好彩我嘅錄音師識講廣東話,幫咗我唔少。雖然你哋聽落仲係怪怪哋,但如果冇佢,肯定讀錯得仲勁。

嚟香港嘅時候曾經有被要求唔可以表演〈學廣東話〉嗎?你認為粗口喺廣東話當中擔當咩角色?
每次去香港都會唱〈學廣東話〉,從來冇被禁止過。我從來冇講過隻歌有粗口,就算有粗口都係文化嘅一部分,代表咗草根性嘅憤怒同喜悅,只係睇你點運用。用得唔好,會引發打鬥;用得好,大家會覺得同你相處非常愉快。

點解會延伸出〈學廣東話〉嘅第二部分〈唱廣東歌〉?透過音樂推廣語言,你認為有咩獨特力量?
之前因為演出去過香港幾次,我發現香港文化同成個環境都一直改變,好多地道文化都消失咗,好似有人活生生地喺我嘅回憶當中搶走一部分咁。雖然我唔係香港人,但呢個城市同文化係我成長嘅一部分,甚至算係幾大嘅一部分,所以我先會覺得傷感。於是通過創作part two嘅〈唱廣東歌〉,記載香港娛樂圈最輝煌時期嘅點點滴滴,算係致青春嘅一個回憶,都係話畀而家年輕人知,當年我哋做咩、聽咩、睇咩長大。

作為鍾意廣東話嘅大馬人,你留意到廣東話近年有咩趨勢?
我發現到,尤其喺娛樂圈同大眾媒體上,廣東話同廣東文化都慢慢地被淡化。雖然大家覺得係一種趨勢,但我始終覺得好遺憾。語言同文化係一個民族嘅根,要保存一個民族嘅特色,就必須先保護佢嘅語言同文化。

你希望香港人點對待廣東話?有咩可以身體力行?
堅持對下一代講廣東話,延續自己獨特嘅文化。

全新作品〈不要去Club〉係點樣獲得靈感?請介紹一下新作。
我嘅全新創作〈不要去Club〉邀請咗台灣電音舞曲教父羅百吉合作,呢首歌係要向千禧年代嘅搖頭歌致敬,台灣稱爲「廣High」。搖頭歌早期主要流行於美國同韓國,後來香港出現好多翻唱作品,於是就有「廣High」呢個詞語,意思係「廣東High歌」,之後再傳入台灣。呢首歌融入早期電音文化,將大家當時嘅回憶慢慢帶返嚟,包括戴手套跳古怪舞步。