*

電郵地址
密碼
submit
submit
CLOSE
issue SEP 2020 VOL: 217
2020-09-22 15:39:23

Common Voice 捐出廣東話聲音

滿語,又稱滿洲語,喺清朝擁有官方語言嘅地位。但因為民族間嘅頻繁交流,以及滿漢通婚等因素,識講滿語嘅人愈來愈少,而家以滿語為母語嘅人唔夠二十個,其中三位已經超過八十歲,而清朝滅亡到呢家不過一百年左右。前排被關注嘅Common Voice計劃,義工團隊成員敬文同Sammy,希望大家都願意捐出廣東話聲音,打造全民參與嘅語言活動:「其實一個語言要消失,真係冇大家想像中需時咁長。」

 

S=Sammy、敬=敬文

 

 

點樣知道Common Voice呢個項目?

S:無論係iOS定Android,近年愈來愈多手機可以做到語音輸入,背後其實需要好龐大嘅數據庫,但因為並冇對外開放,如果公眾人士想使用,只可以用好多錢搵大公司買。而Firefox瀏覽器嘅母公司叫Mozilla,佢哋嘅理念係保持網路開放並成為全球公用資源,於是近年就推出Common Voice。我自己本身有幫Mozilla喺香港做社區性項目,又識咗敬文好耐,知道佢有興趣,又有相熟嘅長者就一齊幫手。


敬:我從事咗好多年長者科技嘅工作,同open source嘅淵源好長。廣東話寫法好有特色,例如告訴個「告」字,其實上面係個「牛」字,但部分字型就冇穿腳。小學老師話錯,阿媽話啱,點解香港政府有規範,但又冇一套字畀你跟?所以我哋將政府4,762隻中文字變成字型,叫「自由香港楷書」。我哋想有個更新版本提升到七千字以上,包括政府中文字版本冇屋邨個「邨」,冇深水埗個「埗」。今次Common Voice都搵長者幫手,但好大鑊。因為首先要收集廣東話句子,再搵人錄音同核對,但我何來有呢堆字呢?市面太少廣東話素材,於是我叫老人家幫手,喺社區拎住部平板電腦慢慢收集,叫佢哋搭車聽人哋講乜。


收集數據有咩有趣事同難處?

S:今次要收集唔同年紀嘅聲音,純粹男女完全唔足夠,因為細路同老人家嘅聲線都唔同。另外要睇埋居住地區,例如香港島半山區有條街叫堅道,我細個都住嗰一帶,我哋會將「道」讀「島」,其他人就會讀「道」。 


敬:我哋有擔心收集返嚟嘅數據質素,驚有雜聲影響,其實我哋唔急要幾時完成,打算持續進行。日本團隊得幾個人幫手錄,但我哋唔想咁,呢個唔係單純科技項目,而係一種在地文化。部分人講嘢有懶音,但只要數據夠闊,呢啲問題就會解決到,我當係一個全民活動,大家一齊去參與就最理想,每個人肯錄幾十句都好重要。


你哋認為用「保育」嚟形容廣東話現今狀態適合嗎?

S:我覺得廣東話需要保育,用廣東話密度最高嘅地方就係香港,你點樣令將來嘅人繼續用呢?講廣東話嘅人代表咗某種意識形態,如果佢哋有日要講普通話,咁又會點改變呢?廣東話發展係悲觀,但如果唔畀自己一絲希望,又何來有希望? 

敬:你有冇食過涼粉,你知唔知涼粉嘅真身係咩樣?其實對農夫嚟講都不值一提,佢係路邊野草,叫涼粉草,係香港原生植物,但而家好難搵到。好多香港人都知涼粉係乜,但冇人去諗佢原本係咩樣。本身同我哋喺同一塊土地上,但而家好似冇咗關係,點解冇咗關係,就係因為冇咗經濟價值。一種文化都要睇有冇經濟價值,我哋同大陸做生意要講普通話,咁點解唔係佢哋講廣東話呢?其實同日本都一樣,日本人都唔太識講英文,可能蝕底啲,但佢哋唔會覺得低等,仍然為日文而驕傲,但香港人唔係,所以係心態問題。


點解想做好呢份義工?

S:而家個科技唔止認到語言,連圖像都認到,如果冇一個廣東話系統,就會同世界有距離。例如你睇YouTube開字幕,英文片可以自動出字幕畀你,但廣東話仍然未做到。

敬:當時對我嚟講呢個項目有個時限,就係2047年之前,但原來唔係,原來早咗27年,都冇人想像到。呢個係好重要去保留港式廣東話嘅社會運動,佢唔屬於任何人,大家可以隨便去用,唔使介意要畀幾多錢,本身個努力就係出自於香港市民,我諗呢個價值係最重要。如果而家唔做,咁幾時做?■

issue SEP 2020 VOL: 217
2020-09-22 15:20:31
秋山 燿平 英文聽入耳 母語聽入心

嚟到科技先進嘅世代,只要主動學習,就算冇離境你都可以學識其他語言。日本YouTuber秋山燿平長居日本,因為善用網絡同參考書,自學大約十種語言,其中包括廣東話。語言無難事,只怕冇心人。


text.陳菁

大多人都相信留學或者去外地工作係學語言最快嘅方式,你點睇?
我並唔否認咁樣能夠幫助語言學習,因為環境配合,你隨時隨地都可以使用當地語言。但嗰種環境真係只有出國先可以得到嗎?我唔同意。而家網絡發達,只要肯主動,就可以搵到願意同你傾偈嘅語言夥伴。我擅長創造外語環境,東京嘅外語文化唔算濃厚,學外語並唔係日本人必要嘅條件。所謂創造外語環境必須連同有吸引力嘅文化產物,好多日本人都鍾意香港電影同電視劇,令佢哋知道學識廣東話之後,可以享受當中內容,就會產生學習動力。

點解學識普通話之後,會有學習廣東話嘅諗法?
唔少日本人識講普通話,但識其他中文嘅就好少。我覺得廣東話嘅影響力僅次於普通話,於是好自然就想挑戰。起初我係基於普通話嘅詞彙同語法去學,用一、兩個星期睇完簡單嘅參考書,我就開始同以廣東話為母語嘅朋友傾偈,每日傾半個鐘,加埋睇香港YouTuber嘅片,慢慢建立練習節奏。

邊個同你講「廣東話唔使學」?用普通話學廣東話有咩盲點?
除咗唔識廣東話嘅華人,部分廣東話使用者都話「廣東話唔使學」。用普通話學廣東話最大嘅盲點係發音,我嘅普通話比較流利,部分廣東話詞彙唔覺意用咗普通話發音,呢個好難改。另一個係語法,正因為兩種語言語法相似,唔小心就將普通話句子直接用廣東話讀出嚟,變成廣東話音嘅普通話。冇學過普通話嘅人,要辨別口語同書面語亦有難度,就呢點嚟講,我反而有少少優勢。

學習嘅過程有咩搞笑事?
認真講嘅廣東話句子,成日唔小心講成粗口。網上教學好常用「教」呢個字,但非常容易講成粗口,簡直係苦難,點練習都學唔識。最後我放棄,寧願當做笑點,而家粗口都變咗我嘅口頭禪。

而家你嘅廣東話水平係點?
我做過幾次全程廣東話嘅直播,仲用廣東話教日文語法,日常對話都冇問題。睇香港YouTuber啲影片基本上唔使睇字幕,但新聞報道有好多高難度詞彙,而家要完全理解仍然有困難。

廣東話有咩獨有嘅趣味?
廣東話嘅魅力之一,係保留好多古代中文嘅特色。日文因為受到古代中文影響,所以同廣東話有好多相似之處。例如日文仍然保留入聲,於是用日文學廣東話發音會更容易。另外,日文仲有用唔少「古漢字」,「食」同「飲」喺兩個語言當中意思都相通。

香港觀眾多謝你學廣東話,但又話廣東話好難學,你點樣理解呢種矛盾情緒?
廣東話好難學的確係事實,佢哋考慮到外國人學廣東話要面對嘅困難,為咗照顧我哋先會咁講,但同時亦容易令我哋失去學習動力。香港人基本上都識普通話同英文,就算唔識廣東話亦可以溝通,我可以理解呢種情緒,但我建議不如多啲講鼓勵說話。

你認為學習廣東話有咩意義同價值?
語言本身係溝通工具,為咗令對方理解自己嘅想法而存在。但所揀選嘅語言都係關鍵,如果你用英文同我溝通,你嘅說話只做到入耳。但如果你努力用我嘅母語傾偈,你嘅說話就可以入心,雙方可以心領神會,呢個就係我學廣東話嘅意義。開始用廣東話拍片之後,YouTube嘅click rate爆升,相信係因為我打開咗你哋個心,令我感覺到學廣東話係啱嘅。「可以溝通」同「心領神會」係兩回事,如果只係想實現前者,可能唔需要學廣東話,但為咗後者就有必要學。隨住科技發展,單純嘅溝通可能會被人工智能取代,後者先係永遠無法被代替,係人類先可以實現得到,所以我覺得學廣東話嘅價值唔會失去。