*

電郵地址
密碼
submit
submit
CLOSE
issue MAR 2016 VOL: 163
2016-03-03 13:37
Karl Andersson & SÖner 四代同堂



Text : 袓慧 / PHOTO : Courtesy of Karl Andersson & Söner

有次人在台南,見到對面有間舖頭賣蒸包叫包仔祿,店面絕不起眼。台南朋友急忙介紹包仔祿乃勁嘢,始創於光緒年間(1886年),如今已傳到第四代。四代傳人仍然上居下舖朝朝搓粉燒炭蒸包,直到永遠。

此際就想起最燶畫面:香港人唔執笠唔排隊。港人的趁墟式打卡非常廉價。最終餐廳小店仍然頂唔住貴租。就算老闆自己有舖唔使挨貴租,不過相比天價舖面價值千千萬萬,又唔想做。最後有錢而又有舖面的,就家族爭產。我們社會根本賤視職人及傳統,面對錢以及家族爭產(其實又係錢),一個包一碗雲吞麵魚蛋河一隻燒鵝都唔會守得住。

幸好Karl Andersson & Söner生於瑞典這些北歐小國,不用理會乜帶乜路。小國居民可以靜靜地做返自己。自1898年由阿太爺Karl Andersson造傢俬起家開始,今日傳到第四代家族後人仍然在同一個地方造傢俬。不過老牌人老心不老,直至今日仍然有好多新作面世。
例如Markus Johansson設計的Mopsy茶几,令你不用再在方形還是圓形中抉擇,因為它同一張茶几已經又方又圓。純木色系單單左拼右搭已經夠過癮,如果加入撞色更加好玩。見到Jesper Ståhl的Bouquet檯,就明白它何解叫Bouquet(一束花) ,因為檯腳的結構正正有如一束花。除了靚,亦方便成堆人圍檯而坐,減少頂腳。我們見到這類百年工房,總會在製作木家具加入這些元素顯功力。不過Joel Karlsson, Krook & Tjäder設計的Reverb,就證明老牌工房一樣可以製作新派產品。Reverb是纖維製作的吸音裝置!你可以吊它在會議檯飯檯中間,或者隨意掛在任何地方,一樣有吸音功能。而且它有十種顏色,掛起成家年輕晒。■