*

電郵地址
密碼
submit
submit
CLOSE
issue MAY 2020 VOL: 213
2020-05-04 14:59:04
黃偉文,What Are You Watching?

近日在看甚麼劇集?

《Ozark》。其實通常一起看很多部,連載中的當然會看新鮮的,但「每周播出」的之間總有空檔,便去看以前miss了未看的舊劇。近月和大家一樣太得閒,stay home兩星期又兩星期無限延長,排隊未睇的舊劇一部又一部清理了不少,《Ozark》已是priority第六、七的,之前《Succession》、《Sex Education》等幾部由season one開始看,都一一全部看完了,最後輪到它。By the way,幾好看!最初想看的原因是,一直都幾喜歡Jason Bateman及Laura Linney。

 

通常是甚麼原因驅使你開始看一部劇集?

有經常follow幾個歐美的影視網站,看到新劇介紹如果吸引的,便「按時留意收看」,另外社交媒體和朋友間口耳相傳都很重要,我有幾個同樣喜歡歐美劇的朋友,例如林寶和Robin Chi,經常分散去看不同的劇,再互相推薦或不推薦。

 

如果要將決定煲劇的因素排次序,題材、製作、幕前、編導,或者其他因素,你會怎樣排?

以上各種因素都有,補充多一種,就是「人人都睇咗,你唔睇好脫節」。或者說,有些劇紅到已是常識甚至社會現象,作為創作人,掌握大眾喜歡的口味話題,作品才有生活的實感。所以,我本人其實麻麻地《Westworld》但集集都看過,不過不知為何《Game of Thrones》竟然又無開始過,可能是因為「西人古裝」是我的盲門兼死穴。

 

哪一類型的劇集是最吸引你?

最吸引的類型是,很個人的一個自創分類,叫「估佢唔到」類(即係唔cliche啦),通常看兩集就feel到是否這一類,這種劇對創作人來說是非常好的靈感刺激。

 

你心目中滄海遺珠的劇集是?

2019年英劇《Years and Years》,不想穿橋,不想劇透,所以還是不去詳細介紹,你們自己去看啦。

 

 

平日煲劇有何習慣?

只有真是扣人心弦的,才會一口氣睇完一集,否則有權看一看、停一停、分開幾截看,但通常同一日之內都會看完同一集。

當我開始看一套劇後,儘可能避開不看社交平台上的相關討論和報導,最討厭被劇透,「絕交」級數的討厭!所以重要的集數或結局一定要第一時間看,防止無良的人穿煲!

最X嬲那些人睇完最新那集,就即刻在ig post張當集死了的演員相片,還要講埋啲乜乸嘢「Bye Bye啦 XXX,you will be missed 」、「I'm so shocked they killed XXX !」一㩒開個instagram就即刻看到而走避不及!喂大佬呀,你睇咗啫我未睇㗎!試過有次係咁,我同出post嗰個人表達不滿,佢居然嬉皮笑臉話,唔緊要啦,你繼續睇啦,我未give away晒你所有樂趣㗎,今集仲有另一個角色都死咗㗎,嗱我專登唔講留返比你自己睇喇!

佢滷味吖,咁我咪連原來仲有一個人死都知道埋囉!

 

下部想看的劇集是甚麼?

《Killing Eve》第三季因為陪大家渡過自我隔離的苦日子,特地提早兩星期開播。